Det er
søndag. Etter tidleg frukost drog eg til San Vito og var på morgonmesse. Lite
skjønar eg, men eitt og anna får eg nå med. «Nella notte» var sagt i samband med
nattverd, det må ha vore «denne natta», resten kjenner me. Veret har i dag vore
mykje finare enn meldt. God temperatur og, heilt oppe i 19 midt på dagen. Sidan
det er søndag ville eg ta meg ein tur litt rundt. Torre Colimena er vel
kortaste stykket å kjøre om ein vil bade i det Joniske hav. Då eg passerte
Latiano fekk eg meg ein liten stopp. Samanstimling av folk i hovudgata gjorde
meg nok nyfiken til at eg parkerte bilen for å ta ein kikk. Ein Fiat 500 er
flott, to er fenomenalt flott, tre er fantastisk fenomenalt flott, fire
er…..nei eg går tom for ord.
Her var
parade og utstilling av Old timers. Flest Fiat 500, nokre Topolini, nokre 600
og så ein og annan Alfa, Lancia, Jaguar, Boble av rette årgang og endåtil ein
type 2 Transporter. Vel verdt å stoppe ja. Så gal etter Fiat 500 som eg er, var det
som euforien nærma seg.
Torre Colimena var slik ein by som søv nå vinterstid.
Rett nok var det nokre restaurantar som var opne, men folketomt var det, både i
gater og på strender. Om Karlsbu hadde blitt flytta til kysten av den joniske
hav, ja så hadde det sett ut som det gjorde der eg var. Slik var stemninga inne
og. Ingenting å klage på når det gjeld maten. Det og slik som på Karlsbu.
Stranda
fekk ein besøkande denne dagen. Hadde lova meg sjølv at eg skulle teste vatnet
og det gjorde eg og. Slett ikkje ille. Vassa til midt på leggen og den kjendest
godt.
Paula er god å ha med som turvenn. Ho er god til å finne vegen for det
meste. Utan henne hadde det vore dumt å reise åleine og heile tida måtte stoppe
for å sjekke kart. Men nokre gonger er ho like mykje til bry som til glede.
Snarvegar er ikkje alltid det. Nokre gonger, når dei går over det som ser ut som
private olivenlundar må eg bare ta kommandoen over henne. I dag måtte eg det når
me skulle ut frå Latiano på veg mot Villa Felizia.
Ingen kommentarer:
Legg inn en kommentar